Domenico Burello (Maierato - VV - 18.10.1920)

Oltre alla poesia in vernacolo, Domenico Burello si dedica anche alla narrativa e alla saggistica. Ha pubblicato per la collana "Lingua antica e mundu novu" (opera in cinque volumi di poesie dialettali); in lingua è presente in varie antologie. Per la narrativa ha scritto le seguenti opere: "Il giallo in sogno", "Piccole storie della resistenza", "I regni che non cadono", "I giochi del sovrano" e "Racconti". Altre sue opere (queste di saggistica) sono "Il tesoro sepolto" e "Perché muore il dialetto"; utile anche ricordare il suo impegno di scrittore di commedie dialettale.

‘A dumanda

Si pigghia pigghia, mo fazzu dumanda,
nta carta ’i bullu ’i centumila liri,
a chiju Gesucristu chi ’a cumanda,
c’haiu bisognu di ’nu gran piaciri,
anzi, chi dicu! eu ’na grazzia vogghiu,
particulari, urgenti, urgenti e comu!

Havi mu mi cuncedi mu mi spogghiu
di chista sciagurata furma d’omu.
I besti cchiù crudili, cchiù feroci,
a paragoni ’i nui su’ pecureji;
nto cori nostru sulu odiu coci,
e ’a morti portamu nsonduveji.

Ndi vitti tanti, ormai, chi inorridisciu,
e si nci pensu ’u vommicu mi nchiana.
’Nu quatrupiti ’u sugnu preferisciu.

Mi schifu m’appartegnu a speci umana.

Addio massaria

Veniti, curriti,
’st’arrobbi accattati!
Fra pocu anduveji
‘u strazzu trovati.

Mi vindu la zzappa
e puru i ttappini,
i vacchi e ’na hiocca
cu sei puricini,
‘na scocca di pira,
ma sì, licciarduni!
su’ all’ariu mpenduti
a ’nu ciavuruni,
’na seggia di guda,
du’ o tri torci turi,
’nu tòccaru, ’n’arpa
e ’nu pisciaturi.

Mi vindu ‘u stuppeju,
‘u coppulu, ‘u crivu,
i scarpi cu attacci
ngrassati cu sivu;
mi vindu ‘a furcata,
i gozzi, i cortari,
conneji d’òrdari
e matassari,
‘n’antica lumera
a ogghiu, cu ‘u micciu,
si vui non sapiti
pur’eu vi l’appicciu;
nc’è pàiura, sciarti,
puntura, ferruzzi,
nc’è faci arrojati
e ‘nu dui-manuzzi;
mi vindu la ciuccia,
‘na pecura strippa,
‘na crapa ch’è minda,
è guja e no attrippa.

Eiàtivi, lindi,
ca liquidu tuttu,
ca cacciu ‘sti morti
e no tegnu luttu.

Non su’ cchiù massaru,
non su’ cuntadinu:
cu’ voli ’u mi trova
’u veni a Turinu.
I tempi cangiaru
mo puru pe mmia,
addio a chista terra,
addio massaria.

Si sbagghiu e mi pentu
ndi pagu li spisi:
e guai su’ mparatu
ca su’ calabrisi.

I dui reguli

O ricchi o poveri,

O belli o brutti,

a pocu a pocu

‘mbecchiamu tutti.

A vecchi e a giuvani,

a radi e a ‘ ncutti,

nu jornu a morti

veni e ‘ ndi futti.

Sulu sti dui reguli

Giusti dassau

Chidu Signuri

Chi ‘ ndi criau.